Американинг Time журнали томонидан Германия канцлери Ангела Меркель анъанавий “Йил одами” номинацияси ғолиби деб тан олинди.

“Йил одами” номинацияси ғолиби ортда қолаётган йилда дунёда содир бўлган яхши ёки ёмон маънодаги ҳодисаларга кўпроқ таъсир кўрсатган шахсларга тақдим этилади. Time журналининг “Йил одами” номинацияси ғолиби NBC телеканалида эфирга узатиладиган тонгги Today шоусида эълон қилинди.

Меркелдан ташқари, йил одами бўлиш учун Россия президенти Владимир Путин, Эрон етакчиси Ҳасан Руҳоний, ИШИД етакчиси Абу Бакр ал-Бағдодий, АҚШ президентлигига номзод Дональд Трамп, шунингдек, афроамерикаликлар ҳуқуқлари учун курашувчи Black Lives Matter ташкилоти фаоллари кураш олиб боришди.

Германия канцлери мазкур номзодлар ичида йил давомида дунёдаги етакчи сиёсий ва иқтисодий ҳодисалар марказида бўлгани туфайли ғалаба қозонди.

Time журналининг Йил одами” номинацияси 1927 йилдан буён декабрь ойида нашр бош муҳаррири томонилан танланади. 1950 йилгача ушбу номинацияга муайян шахслар танланган бўлса, ундан кейин мавҳум шахслар ҳам лойиқ деб топила бошланди. Масалан, 2014 йилда журнал Эбола вирусига чалинган кишиларга ғамхўрлик қилганларни “Йил одами” деб топган эди. Тарихда илк маротаба Атлантика устидан ёлғиз парвоз қилиб ўтган америкалик учувчи Чарльз Линдберг энг биринчи “Йил одами” номинациясига муносиб деб топилган эди.