Хонанда Абдулла Қурбонов “Даракчи” газетасига берган интервьюсида ижодга қайтиб келиши сабаблари ва кейинги йил режалари ҳақида гапириб берди. Шунингдек, у илгари қилган хатоларини англаб етгани ва бошқа бундай ишга қўл урмаслигини таъкидлаб ўтди.

“Янги куч ва ғайрат билан ижодимни бошлаб олдим, - деди у. – Менга шундай имконият бергани учун эса “Ўзбекнаво” эстрада бирлашмасидан ҳам миннатдорман”.
Қурбонов арзимас сабаб инсон ҳаётини остин-устун қилиб юбориши мумкинлигини, буни ўз мисолида кўрганини эътироф этди.

“Кўр ҳассасини бир марта йўқотади, дейишади, - қўшимча қилди у. – Мен ҳам бундай хатоликка бошқа йўл қўймайман”.

Шундан сўнг хонанда янги йилдаги режалари билан ўртоқлашди:
“Март ойида ҳаётимдаги шу икки аёлнинг (яъни онаси ва турмуш ўртоғи) иродаси ва менга бўлган ишончига атаб “Ғийбатларга ишонманг, биз ёнингиздамиз, аёллар” номли яккахон концерт дастурини тақдим этишни ният қилганман. Шунингдек, “Дўст”, “Жоним бўлсин фидо” номли қўшиқларни ҳам тез кунларда мухлислар эътиборига ҳавола этишни режалаштирганмиз”.