АҚШ маъмурияти 2020 йилгача ривожланаётган давлатларга иқлим ўзгаришларига мослашиш учун ажратиладиган грантлар миқдорини икки баробарга кўпайтиради. 2014 йил ҳолатига кўра бу маблағлар миқдори йилига 400 млн долларни ташкил қилган. Бу ҳақда 9 декабрда АҚШ Давлат департаменти матбуот хизмати маълум қилди.

“Икки томонлама ва кўп томонлама каналлар бўйича келиб тушадиган бу маблағлар иқлим ўзгаришларидан азият чекаётган давлатларга инфратузилма, қишлоқ хўжалиги, соғлиқни сақлаш тизими ва сув таъминоти соҳаларида унинг асоратларини камайтиришга имкон беради”, деб таъкидланди Давлат департаментида. Таъкидланишича, умумий ҳисобда 2020 йилгача бу мақсадлар учун ривожланган давлатлар ажратадиган жами маблағ 100 млрд долларни ташкил қилади.

Аввалроқ АҚШ президенти Барак Обама Парижда БМТнинг иқлим ўзгаришлари масалалари бўйича бутунжаҳон анжуманида АҚШ ҳам сайёрамиздаги иқлим ўзгариши учун жавобгарликни ҳис қилиши айтилганди. “Мен энг ривожланган иқтисодиётларга эга давлатлардан бирини тақдим қиламан. Биз ҳам юз бераётган иқлим ўзгаришларига жавобгарликка эга эканлигимизни тан оламиз”,

деб айтганди анжуманда Обама. Обаманинг таъкидлашича, 2015 йил метеокузатувлар олиб борилиши тарихидаги энг иссиқ йил бўлди. “Шунинг учун ҳам бизнинг умумий вазифамиз сайёрамиз келажагини асраб қолишдан иборат”, деб таъкидлаб ўтганди Обама.