Канада ҲҲК суриялик қочқинларни мамлакатга ташишни бошлади. Бу ҳақда 9 декабрь куни Канада бош вазири Жастин Трюдо маълум қилди.
“Қочқинларни кўчириш бизнинг канадаликлар ва дунё ҳамжамияти олдидаги мажбуриятларни бажараётганимизни намоён этиб, Канаданинг (бу одамлар учун) кўпроқ нарса қила олиши ва қилиши шартлигини тушунишини англатади”, - деди бош вазир.

Трюдо бортида 416 нафар қочқин бўлган илк ҳарбий-транспорт самолёти Торонто (Онтарио провинцияси) аэропортига қўнганини маълум қилди. Иккинчи самолёт эса Монреалга (Квебек провинцияси) парвоз қилади. Бош вазир қанча миқдордаги қочқинлар қаердан Канадага учиб келаётгани ҳақида маълумот бермади.

Ўтган ҳафтада иммиграция, қочқинлар ва фуқаролик вазири Жон Маккаллум Канада 2016 йилнинг мартига қадар Суриядан энг камида 35 минг нафар қочқинни қабул қилиб, ўз ҳудудига жойлаштириши тўғрисида маълум қилган эди.