Мексикалик наркобарон, Эль Чапо (Пакана) лақаби билан машҳур Хоакин Гусман ИШИД террорчи гуруҳи етакчиси Абу Бакр ал-Бағдодийга электрон почта орқали мактуб жўнатди. Унда наркобарон жангариларга унинг “моли” партияси йўқ қилингани учун таҳдид солган. Бу ҳақда Sick Chirpse интернет портали хабар бермоқда.

Айни кунларда қидирувда бўлган “Синалоа” картели раҳбари ИШИДнинг хатти-ҳаракатларидан норозилигини билдирган. Ўз мактубида у террорчиларнинг картелнинг Яқин Шарқдаги бизнесига аралашишга бўлган уринишларини жиддий хато деб баҳолаган.

Эль Чапо унинг одамлари ИШИДдан “қарз узиб қўйишлари”ни ва, агарда жангарилар яна наркооперацияларга аралашса, уларни йўқ қилишини айтиб огоҳлантирган.
Эль Чапо шу йилнинг 12 июль куни Мексика қамоғидан қочиб кетди. Уни олиб чиқиш учун 10 м чуқурликда 1.5 км ли туннель қазилгани аниқланди. 14 июль куни Мексика ҳукумати Эль Чапони ушлашга ёрдам берадиган маълумотларни етказган одамга 4 млн доллар мукофот эълон қилди.