Саудия Арабистони қироли Салмон ибн Абдул Азиз Ар-Риёдда Форс кўрфази араб давлатлари ҳамкорлик кенгашининг 36-саммитини расман очди. У ўз нутқида асосий нефть қазиб олувчи давлатлар ҳукмдорлари олдида Женева коммюникеси асосида Суриядаги вазиятни “сиёсий йўл билан ҳал қилиш зарурлигини” айтди.

Қиролнинг айтишича, араб ҳукмдорлари “Яманда тинчлик ва хавфсизликнинг тикланишига интилмоқдалар”. “Ислом давлатлари дини йўқ террорни рад этади”, деб айтди қирол.

Саудия Арабистони хорижий ишлар вазири Низор ибн Обод Маданийнинг маълум қилишича, Ар-Риёддаги саммитга “катта умидлар боғланмоқда”. Саммитда, бир қатор масалалар билан бирга нефть нархининг пасайиши ортида нефть бозорларидаги вазият муҳокама қилинади. Халқаро валюта жамғармаси прогнозларига кўра, араб қиролликларининг нефть экспортидан оладиган даромади қисқариши ҳисобига уларнинг иқтисодий йўқотишлари жорий йилда 275 млрд долларни ташкил қилади.  

Саммитда муҳокама қилинадиган долзарб минтақавий масалалардан бири Эрон ядровий дастури бўйича келишувдан кейин Теҳрон билан муносабатларни нормаллаштириш бўлади. Форс кўрфази араб давлатлари ҳамкорлик кенгаши маъмурияти раҳбари Абдулатиф аз-Заёнийнинг айтишича, “буни амалга оширишда Эрон томонидан Форс кўрфазида БААга тегишли учта оролнинг босиб олиниши тўсқинлик қилмоқда”.