2015 йилги халқаро иқтисодиётнинг ўсиши 2008-2009 йиллар инқирозидан буён энг паст кўрсаткични қайд қилди. 2016 ва 2017 йил прогнозлари вазиятнинг янада мураккаблашиб боришини кўрсатмоқда.

БМТнинг янги ҳисоботида қайд қилинишича, жаҳон иқтисодиётининг ўсишига беш асосий омил тўсқинлик қилмоқда: макроиқтисодий номаълумлик; хом ашё товарларининг паст нархлари ва савдо оқимларининг қисқариши; валюта курслари ва капитал оқимлари ўзгарувчанлигининг ошиши; инвестициялар ва меҳнат самарадорлиги ўсишида кузатилаётган турғунлик; иқтисодиётнинг молиявий ва реал секторлари ўртасидаги катта узилиш.

Ҳисоботда хабар қилинишича, Хитой, Бразилия, Россия сингари ривожланаётган давлатлардаги иқтисодий ўсиш пасайиб бораверади. Бундай вазиятда глобал ўсишни таъминлаб берадиган иқтисодиётларга яна ривожланган давлатлар айланади.
2016 йили жаҳон иқтисодиётининг ўсиши 2.9 фоизни, 2017 йилда эса 3.2 фоизни ташкил қилади.

Иқтисодий вазият ўтиш иқтисодиётидаги давлатларнинг меҳнат бозорларига ўта салбий таъсир кўрсатгани алоҳида қайд қилинди.