Қирғизистон махсус хизмати ходимлари томонидан Бишкекнинг аҳоли зич яшовчи ҳудудларидан бирида ўтказилган махсус операция давомида халқаро террорчилик ташкилотига аъзо икки нафар террорчи йўқ қилинди. Бу ҳақда “Интерфакс” хабар бермоқда.

“10 декабрь тунда Миллий хавфсизлик давлат қўмитаси ходимлари томонидан “Восток-5” кичик туманида ўтказилган контртеррор операцияси давомида халқаро террорчилик ташкилотининг бўлими фаолияти аниқланди. Уларни қўлга олиш вақтида террорчилар очиқ-ойдин қуролли қаршилик кўрсатишди. Натижада икки нафар террорчи йўқ қилинди”, — дейилади мамлакат миллий хавфсизлик давлат қўмитаси матбуот хизмати маълумотида.

Маълум бўлишича, махсус операция давомида мамлакат миллий хавфсизлик давлат қўмитасининг бир ходими яраланган, тинч аҳоли вакиллари ўртасида жабрланганлар йўқ.