2016 йилда Россиянинг Суриядаги операцияга сарфлайдиган пули 1,2 млрд долларни ёки кунига 3,3 млн долларни ташкил қилади. Бу ҳақда Bloomberg операцияга сарфланаётган пуллардан хабардор бўлган манбаларга иқтибос келтирган ҳолда маълум қилди.

Агентлик иқтибос келтираётган Лондондаги Қироллик мудофаа тадқиқотлари бирлашган институтининг баҳолашича, Россия ноябрь ўрталаригача Суриядаги кампанияга кунига 4 млн доллар сарфлаган, бироқ Туркия Су-24 самолётини уриб туширгандан кейин, бу харажатлар деярли икки баробарга – 8 млн долларгача ёки йилига 3 млрд долларгача оширилган.

Агентликнинг таъкидлашича, бундай харажатлар нефть нархлари яна пастлагани ҳисобга олинса, Россия бюджетига жиддий таъсир килиши мумкин. Шу билан бирга Россия ҳукмрон доиралари орасида Россиянинг Суриядаги операцияси қанча давом этиши ҳақида аниқ тушунча йўқ.

“Бу операция камида бир йил давом этади. Биз Сурия армиясидан кўпроқ жонбозликни кутгандик”, деб айтди Россия Федерал кенгашининг мудофаа бўйича қўмитаси раҳбари ўринбосари Франц Клинцевич.

Бундан ташқари, агентликнинг таъкидлашича, Россия ҳукумати янги қуролланиш дастурларини амалга ошириш учун харажатларни камайтиришга мажбур бўлмоқда.

Аввалроқ Россия бош вазири Дмитрий Медведев Суриядаги операцияга кетаётган харажатларни “сир” деб, айтишдан бош тортганди.