АҚШ президентлигига номзодлардан бири Дональд Трампнинг хурмача қилиқлари шунчаки шармандали сифатида баҳоланган бир пайтда, Франциянинг ультраўнг партияси етакчиси Марин Ле Пеннинг баёнотлари чинакам таҳдид солмоқда. Financial Times нашрининг ёзишича, ушбу арбоб ҳокимият тепасига келган тақдирда Европанинг сиёсатини бутунлай ўзгартириб юбориши мумкин.

Марин Ле Пен отаси Жан-Мари Ле Пеннинг ўрнини эгаллаб, у ердаги ошкора ирқчилик риторикасини бироз пасайтирди, ва эндиликда 2017 йилда президент бўлишдан умид қилмоқда. Ўзининг псевдоватанпарварлик мафкураси ёрдамида у яҳудийлар ва мусулмонларга зарба бермоқчи, деб ҳисоблайди газета колумнисти.
Париж терактларидан сўнг французларда пайдо бўлган қўрқув ультраўнгларга ўз мақсадларига эришишни осонлаштиради. Ироқ, Сурия ва Афғонистондан қочқинлар оқимининг келиши ҳам Ле Пен хонимга чинакам совға бўлди. Бир неча йиллар давом этган ишсизлик, стагнация ва муҳожирларнинг кўпайиши миллатчиликнинг кучайишига сабаб бўлмоқда.

Шу тариқа, таҳлилчининг фикрича, Марин Ле Пен учун асосий ютуқли мавзулар қўрқув ва ксенофобия бўлади. Ҳозирча у мамлакат етакчиси эмас, лекин бундай имкониятнинг ўзи ҳам экспертларни ташвишга солмоқда. Унинг ҳам ички, ҳам ташқи душманга қарши курашиш риторикаси Европага жиддий таҳдид солади, хулоса қилади мақола муаллифи.