Қозоғистоннинг жанубий пойтахтида қалбаки ҳужжатлар ясаб олган, полициячи либосини кийган фирибгар ҳайдовчилардан пул олаётгани аниқланди. Уни “Бўрон-152” йўл патруль полицияси экипажи Еттисув туманида кўриб қолди. Суриштирувлар натижасида унинг қаллоб эканлиги маълум бўлди.

Айтилишича, полиция либосидаги фирибгар икки кўча кесишувида туриб олиб, ўтаётган автотранспорт воситаларини таёқча билан тўхтатган ва текширган, ваҳоланки йўл патрули полицияси экипажлари аллақачон бу эскирган усулдан воз кечиб, узоқ йиллар давомида хизматни автопатруль усулида олиб бормоқда.
Текширув чоғида эркакнинг ёнидан сохта гувоҳнома, ўчирилган радиостанция, кишан, ишламайдиган видеорегистратор ҳамда ички ишлар ходимлари учун маълумотнома топилди.

“Ҳужжатларнинг сохталигини бир қарашда сезиш мумкин эди. Бундан ташқари, у бизнинг саволларимизга тузук-қуруқ жавоб бера олмади”, - деди жиноятчини қўлга олган полиция сержанти Серик Ўрозхонов.
Аниқланишича, фирибгар ушбу либосда шаҳарнинг турли четларида одамларни алдаб, пул ундириб келган. Айниқса у автотураргоҳларда машинасини нотўғри қўйиб кетган одамларни осон ўлжага айлантирган.
Воқеа жойига етиб келган оператив тергов гуруҳи қаллобнинг шахсини аниқлади ва тергов ҳаракатларини бошлаб юборди.