Ўзбекистон давлат санъат ва маданият институти ҳузуридаги педагог кадрларни қайта тайёрлаш ва малакасини ошириш маркази томонидан ташкил этилаётган “Мутахассислар малакасини ошириш” лойиҳасининг навбатдаги босқичи якунланди. Бу ҳақда ЎзА хабар бермоқда.

Шу муносабат билан Ўзбекистон Республикаси Маданият ва спорт ишлари вазирлиги, «Ўзбектеатр» ижодий-ишлаб чиқариш бирлашмаси ҳамкорлигида ташкил этилган тадбирда мамлакатимиздаги мусиқали ва драма театри актёрлари, профессор-ўқитувчилар, ёшлар иштирок этди.

Тингловчилар учун пойтахтимиздаги маданият ва санъат кошоналарида кўчма машғулотлар ташкил этилди.

Актёрларга мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш асослари, театр фаолияти ва унинг аҳамияти, ахборот-коммуникация технологияларидан фойдаланиш, режиссура, вокал санъати, актёрлик маҳорати, саҳна ҳаракати каби соҳалар бўйича сабоқлар берилди.