Бортида 163 нафар суриялик қочқин бўлган ҳарбий-транспорт самолёти Торонто аэропортига (Онтарио вилояти)га келиб қўнди. Бу ҳақда AP агентлиги маълум қилган.

Канада ҳарбий-ҳаво кучларининг мамлакатга суриялик қочқинларни олиб келиши ҳақда 9 декабрь куни мамлакат бош вазири Жастин Трюдо маълум қилган эди. "Қочқинларни мамлакат ҳудудига жойлаштиришимиз бизнинг канадаликлар ва бутун ер аҳолиси олдидаги бурчимиз эканлигини кўрсатиб беради. Канада бу инсонлар учун кўп нарса қилиб бериш кераклигини тушунади”, - деган эди ўшанда бош вазир.

Унинг сўзларига кўра, иккинчи борт 12 декабрь куни Монреалга (Квебек вилоятига) келиб қўнади. Йўловчилар сони ва қочқинлар Канадага айнан қаердан олиб келиниши ҳақида бош вазир айтиб ўтмаган.