«Пётр Порошенко блоки» (БПП) партияси халқ депутати Олег Барнани ўз аъзолари сафидан ўчирди. Бунга у томонидан парламент йиғилиши вақтида Украина бош вазири Арсений Яценюкка нисбатан қилинган ножўя хатти-ҳаракат сабаб бўлган.

Бу ҳақда фракция матбуот хизмати бошлиғи Тарас Пастушенко УНИАН агентлигига хабар берган. Унинг қўшимча қилишича, бу бўйича қарор фракция аъзоларининг кўпчилик қисми овоз бериши орқали қабул қилинган.

Қайд этиш керакки, Барнанинг ўзи Рада қўмитасига чақирилганида "фракцияни тарк этиши" ҳақида маълум қилганди.

Эслатиб ўтамиз, парламент йиғилиши чоғида Олег Барна бош вазирга ташланиб, уни минбардан суриб чиқаришга ҳаракат қилди. Бундан ташқари, у Яценюкка мотам тасмасига ўралган гулдаста совға қилди.

Воқеа Яценюкнинг Рададаги тарафдорлари ва рақиблари ўртасидаги қизғин муштлашувга кўчди.

Жанжал тинчигач, ППБ фракцияси етакчиси Юрий Луценко бош вазирдан кечирим сўради.