Ливияда ИШИД жангарилари Сабрат шаҳридаги қадимий давр маданий ёдгорликларини йўқ қилди, деб хабар бермоқда i24News нашри. Шаҳарда 3-асрга тааллуқли бўлган Рим империяси маданий ёдгорликлари бўлган.

“Сабратда археологлар учун қимматли бўлган юнон-рим империяси маданий объектлари, топилмаларнинг юздан бир қисми тўпланган. ИШИД жангарилари бу асори-атиқаларга ўзгача назар билан қарайди: улар учун ҳайкаллар ва санъат асарларидаги инсон тасвири –бутлардир ва террорчилар уларни вайрон қилади”, деб айтди Рим империясини ўрганувчи Лестер университети профессори Дэвид Маттингли.

Манбаларга кўра, Сабрат милоддан аввалги 5-асрдан финикийликларга тегишли бўлган ва савдо шаҳри ҳисобланган. Милоднинг 1-асридан шаҳарда Рим империясига хос урф-одатлар жорий қилина бошлангандан кейин, у 2-3-асрлар давомида тўлиқ қайта қурилган.

1982 йилда ЮНЕСКО шаҳарни Бутунжаҳон маданий мероси объектлари қаторига қўшган.