"Халқаро коалициянинг Афғонистондан олиб чиқилиши минтақадаги вазиятни янада оғирлаштирди", дейди Ислом Каримов Ашхободдаги халқаро конференциядаги чиқиши вақтида.

"Афғонистондаги вазиятга диққат билан эътибор қаратиш зарур. Афғонистондан ҳарбийларнинг олиб кетилиши ва бу мамлакатга молиявий ёрдам кўрсатилиши камайиши вазиятни янада ёмонлаштирди", дея иқтибос келтирилади президент нутқидан Sputnik нашрида.

Ислом Каримовнинг фикрича, айни вақтда дунёда халқаро ва глобал хавфсизлик архитектураси бутунлай ўзгариб кетди.

"Террорчиликни рағбатлантирувчи ҳамда молиялаштирувчи марказлар вужудга келган ва улар жазоланмай қолмоқда", дейди президент.

Ислом Каримов яна бир марта Ўзбекистоннинг халқаро майдондаги позициясини таъкидлаб ўтган.

Ўзбекистон раҳбарининг таъкидлашича, Ўзбекистон ҳудудида хорижлик ҳарбийларнинг фаолиятига йўл қўйилмайди ва ўзбекистонлик аскарлар бошқа давлат ҳудудидаги ҳарбий амалиётларда иштирок этишмайди.

Ислом Каримов Туркманистон президенти Гурбангули Бердимуҳамедовнинг таклифига биноан Ашхобод шаҳрида бўлиб турибди.

Ўзбекистон президенти ташриф доирасида БМТ Бош ассамблеяси томонидан Туркманистоннинг доимий бетарафлик мақоми тан олинганининг 20 йиллигига бағишланган “Бетарафлик сиёсати: тинчлик, хавфсизлик ва тараққиёт йўлида халқаро ҳамкорлик” халқаро конференциясида иштирок этмоқда.

Маълумот учун, 2001 йилда БМТ Хавфсизлик кенгашининг 1386 резолюциясига биноан Афғонистоннинг муваққат ҳукуматига ёрдам бериши учун халқаро коалиция кучлари ташкил этилганди. Бу контингент ўтган вақт давомида Афғонистон армиясини ўқитиш ва мамлакат хавфсизлигини таъминлаш билан шуғулланиб келди. 2014 йилнинг 31 декабрида эса бу коалициянинг миссияси тугаллангани эълон қилинди. 2015 йилнинг 1 январида НАТО Афғонистонда 12 минг кишидан иборат ҳарбий бўлинма Афғонистон ҳукуматига ёрдам учун қолдирилишини маълум қилди.

Афғонистондаги вазият охирги ойларда ёмонлашди. Аввалига асосан тоғли ҳудудларда фаолият кўрсатган толибонлар эндиликда текисликдаги ҳудудларни эгаллашга киришди. Шунингдек, мамлакат шимолида ИШИДнинг бўлинмаси пайдо бўлди. "Толибон" ва ИШИД рақобатчи ҳисобланади. Шу йилнинг июнида ОАВларда "Толибон" ИШИДга ўз ишларига халақит бермаслик талаб қилинган мактуб йўллагани хабар қилинди. Айни вақтда Афғонистонда тўқнашувлар ва терактлар сони ортган.

Бироз олдинроқ, ИШИД Афғонистон шимолида янги база ташкил этаётгани хабар қилинганди.