АҚШ президентлиги учун сайловда Демократлар партиясидан асосий номзод ҳисобланган Ҳиллари Клинтон мамлакат президентига айланса, ИШИД муаммосига қарши жиддий курашишни ваъда қилди. Бу ҳақда Ассошиэйтед Пресс нашрида ёзилган.

У бу ҳақида Оклаҳома штатида (бу штат аҳолиси республикачиларга мойил - таҳририят изоҳи) ўтказилган маросим вақтида айтиб ўтган. Унинг сўзларига кўра, кўплаб сиёсатчилар қуруқ ваъдалар беришади, лекин бажаришмайди. Чунки, улар бу борада амалиётга эга эмаслар.

"Мен аввал ҳам Оқ уйда ишлаганман ва Америка хавфсизлигини таъминлаш нима эканини биламан", дейди собиқ давлат котиби.

Ноябрь ойида Клинтон хоним ИШИДга қарши ҳаводан зарба беришни кучайтириш кераклигини айтиб ўтган, лекин қуруқликда ҳарбий амалиётлар бошлашга қаршилигини билдирганди.

"ИШИДни тўхтатиш эмас, бутунлай йўқ қилиш керак", деганди Клинтон.

Бироз олдинроқ эса у АҚШнинг ИШИДга қарши уруш эълон қилишига ҳали эрта деб ҳисоблашини айтиб ўтганди.