2015 йилнинг учинчи чорагида Россия ва Ўзбекистон ўртасидаги пул ўтказмалари ҳажми 797 млн долларни ташкил этди. Бу эса 2014 йилнинг учинчи чорагидаги кўрсаткичдан (2,227 млрд доллар) 2,79 баробарга кам. Бу ҳақда Россия Марказий банки маълумотларида келтирилган.

Банк маълумотида айтилишича, учинчи чоракда Ўзбекистонга Россиядан 725 млн доллар миқдоридаги маблағ жўнатилган. Бу борада ўтган йилнинг шу даврига нисбатан 2,83 баравар пасайиш қайд этилган. Ўз навбатида бу вақтда Ўзбекистондан Россияга 72 млн доллар миқдоридаги маблағ жўнатилган (2014 йилнинг учинчи чорагига нисбатан 2,44 баробар пасайиш).

2015 йилнинг учинчи чорагида Россиядан Ўзбекистонга амалга оширилган битта операцияда ўртача 482 доллар жўнатилган (1 йил олдинги кўрсаткич 648 доллар).

2015 йилнинг учинчи чорагида Ўзбекистондан Россияга амалга оширилган битта операцияда ўртача 1572 доллар жўнатилган (2014 йилда 2058 доллар).

2015 йилнинг 9 ойи давомида Ўзбекистон ва Россия ўртасидаги умумий пул айланиш ҳажми 2,195 млрд долларни ташкил этиб, 2014 йилнинг 9 ойига нисбатан 2,3 баробарга камайган.

2015 йилнинг 9 ойи давомида Россиядан Ўзбекистонга жами 1,874 млрд доллар юборилган ва 2014 йилнинг 9 ойига нисбатан 2,3 баробар пасайиш қайд этилган.

Эслатиб ўтамиз, 2015 йилнинг биринчи ярим йиллигида Россиядан Ўзбекистонга пул ўтказмалари ҳажми 56 фоизга қисқарганди.

Қайд этиш керакки, Россия ҳудудида айни вақтда 2 млн нафардан ортиқ Ўзбекистон фуқароси ишламоқда.