Камбожада гуруч виносидан заҳарланиш оқибатида 19 киши ҳалок бўлди, яна 172 киши шифохонага ётқазилди, деб хабар бермоқда Камбожа соғлиқни сақлаш вазирлигига иқтибос келтирган ҳолда Франс Пресс ахборот агентлиги.

Аввалроқ Камбожа шарқидаги Кратьэх вилоятида гуруч виноси истеъмол қилишдан кейин 2 киши ҳалок бўлгани, 44 киши шифохонага ётқазилгани маълум қилинганди. Вилоятда яшовчи яна 3 киши ит гўштидан заҳарланиб ҳалок бўлган. Ўзини ёмон ҳис қилаётган одамлардан шикоятлар 19 ноябрдан туша бошлаган.

Вилоят раҳбарияти гуруч виноси ишлаб чиқарувчиларга ўз фаолиятини тўхтатишни буюрди. Мамлакат соғлиқни сақлаш вазири аҳолига тегишли назоратсиз ва ҳукумат томонидан рухсат олмаган ҳолда ишлаб чиқарилаётган гуруч виносини истеъмол қилмасликни тавсия қилди.

Бу Камбожада юз бераётган биринчи бундай ҳолат эмас.