Ливан хавфсизлик кучлари вакили 12 ноябрда Байрут яқинида портлашлар уюштирган, ИШИДнинг қўпорувчи бўлими бошлиғи, террорчи Билол ал-Баккарнинг қўлга олинганини маълум қилди, деб хабар бермоқда Al-Manar нашри.

Имом Ҳусайн шиалар масжиди ёнида амалга оширилган терактлардан кейин ўтказилган махсус операция доирасида 19 нафар хавфли жиноятчи қўлга олинди, террорчиларнинг мамлакат шимолида “ислом амирлиги” яратиш бўйича режалари барбод қилинди.

Маълум қилинишича, қўпорувчи гуруҳлардан бири Байрут-Триполи соҳилбўйи йўлидан ўтадиган туннелни портлатишни режалаштирган. Агар бу теракт содир этилганда шимолий туманлар кесиб қўйилиши мумкин эди.

Аввалроқ Ливан ташқи ишлар вазири Жаброн Босил Байрут террорчиликка қарши курашда Россияга ёрдам сўраб мурожаат қилиши эҳтимоли борлигини айтганди.