АҚШнинг Пенсильвания штатидаги Walmart супермаркетида иккита тўппонча билан қуролланиб, одамлар ҳаётига таҳдид қилган номаълум шахс полициячи томонидан отиб ташланди. Бу ҳақда CNN телеканалида хабар қилинди.

Полициячилардан бирининг айтишича, бу шахс супермаркет биносига бостириб кирган ва мижозларга қурол ўқтала бошлаган. Воқеа жойига дарҳол полициячилар чақирилган. Улар супермаркетга киришган ва бу шахсдан қуролларини топширишни сўрашган. Лекин бунинг ўрнига у қуролларни полициячиларга йўналтирган.

Шундан сўнг, полициячилардан бири унга ўқ узишга мажбур бўлган. ОАВ маълумотига кўра, у маҳаллий шифохонага олиб борилгач, жон берган. Қайд этилишича, бу воқеа туфайли супермаркет мижозлари орасида ҳам, полиция вакиллари орасида ҳам жабрланганлар йўқ.

Айни вақтда ўлдирилганнинг шахсини аниқлаш учун текширув олиб борилмоқда.