13 декабрь куни Туркманистон-Афғонистон-Покистон-Ҳиндистон газ қувурининг (ТАПҲ) Туркманистон ҳудудидаги қисми қурилиши бошланди. Мари шаҳрида ўтказилган очилиш маросимида мамлакат президенти Гурбангули Бердимуҳаммедов, Покистон бош вазири Навоз Шариф, Афғонистон раҳбари Ашраф Ғани Аҳмадзой ҳамда Ҳиндистон вице-президенти Муҳаммад Ҳамид Ансорий иштирок этди.

Қувур узунлиги 1814 километрни ташкил этиши мўлжалланган. Шундан 214 километрлик қисми Туркманистон ҳудудидан ўтади (Афғонистон ҳудудида 774, Покистондан Ҳиндистон чегарасигача 826 км). Афғонистондаги қувур Ҳирот ва Қандаҳор шаҳарлари бўйлаб, Покистондагиси Кветт ва Мўлтон шаҳарлари бўйлаб ўтиши ҳамда Ҳиндистон билан чегарадаги Фазилка шаҳригача бориши айтилган. Қувур бўйлаб газ ҳайдаш ишлари 2019 йилдан бошланиши кутилмоқда.

Қувур орқали йилига 38 млрд кубометр газ ташилиши имкониятига эришиш режалаштирилган (Кунига 90 миллион кубометр).

Ушбу лойиҳа қиймати 10 миллиард долларга баҳоланган бўлиб, уни амалга оширишда Туркманистонга Осиё тараққиёт банки молиявий кўмак беради.

Лойиҳанинг техник ва иқтисодий асосини банк буюртмасига кўра Британиянинг Penspen компанияси тайёрлади.

Маълумот учун, Туркманистон газ захиралари бўйича дунёда тўртинчи ўринда туради.