Япония ҳукумати Бангладешга инфратузилмавий ва инвестицион лойиҳаларни ривожлантириш учун 1,1 млрд доллар кредит тақдим қилади. Бу кредит 1974 йилдан бери тақдим қилинадиган энг йирик кредит бўлади, деб маълум қилинди Япониянинг Даккадаги элчихонасида.

Лойиҳалар орасида Бангладешнинг икки йирик шаҳри: Дакка ва Читтагонгдаги энергия тизимини мустаҳкамлаш бор. Бундан ташқари, пуллар соғлиқни сақлаш тизими ва биноларнинг хавфсизлигини таъминлаш бўйича лойиҳаларга йўналтирилади. 40 йилга бериладиган кредитга 0,01 фоиз ставкаси амал қилади.

Бангладеш, шунингдек, Жаҳон банки, Халқаро валюта жамғармаси ва АҚШнинг халқаро тараққиёт агентлигидан хорижий ёрдам олади. Ўтган ой бўлиб ўтган учрашувда халқаро ҳамжамият мамлакат раҳбариятини хорижий ҳамкорлардан боғлиқликни камайтириш ва йирик лойиҳалар устида хусусий сектор билан яқиндан ишлашни бошлашга чақирди.