Стокгольм тинчлик муаммолари тадқиқотлари институти мутахассислари томонидан ишлаб чиқилган ва эълон қилинган 2014 йилнинг энг йирик қурол ишлаб чиқарувчи компанияларининг ўнлигига АҚШнинг 7та компанияси кирди. Ҳисобот ташкилотнинг расмий сайтига жойлаштирилди.

Юзталик рўйхатнинг бошида турган Lockheed Martin ўтган йил давомида 37.47 млрд долларга қурол-яроғ сотишга муваффақ бўлган. Ундан кейинги ўринда 28.3 млрд доллар кўрсаткич билан Boeing турибди. Кучли учликка Буюк Британиянинг BAE Systems компанияси (25.73 млрд доллар) якун ясади.
Шунингдек, кучли ўнликка АҚШнинг Raytheon, Northrop Grumman, General Dynamics, United Technologies Corp., L-3 Communications, Италиянинг Finmeccanica ҳамда Трансевропа Airbus Group компаниялари кирди.

Юзликка, шунингдек, Россиянинг 11 компанияси кирди.
“Россия компаниялари миллий ҳарбий харажатлар ва қуролланиш экспортининг кўтарилиши тўлқинлари устида бўлди. Биринчи юзликка ҳозир Россиянинг 11 компанияси киради, уларнинг даромадидаги умумий ўсиш 2013-2014 йилларда 48.4 фоизни ташкил қилди”, - деди институтнинг катта илмий ходими Симон Веземан.