Номаълум жиноятчилар АҚШнинг Калифорния штати жанубидаги Ҳафторн шаҳарчасида жойлашган масжидга ўйинчоқ граната ташлаб кетишди. Шунингдек, бу масжиднинг ташқи деворига "Иусис" ёзуви битиб кетилган.

АВС нашри хабарига кўра, масжид ҳудудидан ўйинчоқ граната топилгач, масжид ичидагилар эвакуация қилинган ҳамда сапёрлар чақирилган.

Шунингдек, шаҳардаги яна бир масжид деворида шундай ёзув аниқланган.

Айни вақтда ҳодиса тафсилотлари ўрганилмоқда.

Полиция бу ҳолатларда нафрат жиноятлари аломатларини қайд этган.

Бундан олдинроқ, Калифорнияда масжидга ўт қўйишда гумон қилинган шахс қўлга олингани ҳақида хабар берилганди.

Калифонияда истиқомат қилувчи мусулмонлар журналистларга охирги вақтларда, хусусан Сан-Бернардинодаги оммавий қотиллик воқеасидан кейин таҳдид хавфи остида қолишганини айтишган.

Эслатиб ўтамиз, 2 декабрь куни Палм-Спрингсдан 120 км масофадаги Сан-Бернардино шаҳридаги ногиронларни ҳимоя қилиш марказида шу марказ ходими Сайд Ризван Фаруқ ва унинг рафиқаси Ташфен Малик отишма содир этган ҳамда 14 кишини ўлдириб, 21 кишини жароҳатлашганди.