Тобора авжига чиқаётган миграцион инқирозни енгиб ўтиш йўлида Европа Иттифоқи ўз қадриятларини унутишга ва Туркияда инсон ҳуқуқлари бузилишига кўз юмишга тайёр, деб ёзмоқда National Interest газетаси.

Мақола муаллифининг эслатиб ўтишича, Европа Туркияга 3 млрд евро тақдим этишга тайёр, шунингдек, Анқаранинг ЕИга кириши борасидаги музокараларни тезлаштириш ва виза тартибини юмшатиш эвазига ундан Суриядан қочқинлар келишини сусайтиришни сўрайди.

Айтилган сумманинг энг катта қисмини – 534 млн еврони Германия тўлайди. Буюк Британия гарданига 410 млн, Францияга эса 386 млн евро тўғри келади. Марказий ва Шарқий Европанинг айрим давлатлари бундай ташаббусга қарши чиқишди, негаки ЕИ таркибига кирмайдиган давлатга бунча пул беришни ишончсиз қадам деб баҳолашди.
Нашр яқинда содир бўлган терактлардан сўнг Европа эгаллаган позицияни “сурбетлик” деб баҳолади. Таҳлилчи Фади Хакуранинг таъкидлашича, Туркиянинг ЕИга аъзо бўлишидан асосий мақсад иқтисодий манфаатларни кўзлаган бўлиб, мамлакатда демократияни ривожлантириш мақсади қўйилмаган.