Қозоғистон президенти Нурсултон Назарбоев йил якунлари бўйича берган интервьюсида тадбиркорларга бизнесни қонунийлаштириш ва хусусийлаштиришда фаолроқ иштирок этиш зарурлигини эслатиб ўтди.

“Давлат бойиб кетишга имкон берган одамларни бирма-бир биламан. Ҳаммани қонунийлаштиришда иштирок этишга чақираман. Мен уларнинг ҳар бири қандай бойиганини биламан. Биринчидан, уларнинг ўзлари бунга қодир, ғайратли эдилар. Давлат улар учун шароит яратиб берди, бундан кеккайиш шарт эмас. Ночорликдан чиққан бойлар оддий уй қуриш ўрнига 4 қаватли уйлар қура бошладилар – бу уйни сақлаш учун қанча одам, фаррошлар керак?”, деб сўради Назарбоев.   

Назарбоев у Хитойда “Ипак йўли одами” мукофотига сазовор бўлгани ва бунга қўшимча яхши пул мукофоти ҳам берилганини айтиб ўтди.

“Мен бу пулнинг бир қисмини раҳм-шафқат жамғармасига, бир қисмини қозоқ тилини ўрганиш учун бердим. Мана ўша раҳм-шафқат жамғармасига берган 300 минг долларим. Мен ўзимдан жуда мамнун бўлдим. Даволана олмаган болалар, даволаниб нормал ҳаётга қайтдилар. Ўзига тўқ одамлар хайрия ишларида фаол иштирок этишлари керак, Қозоғистон бундай одамларни билиши керак – мана ночорлар, касалларга ёрдам берган саҳоватпеша, деб билсин. Мана, шу жамият нормал жамиятдир, биз бунга қараб кетмоқдамиз, биз ҳали ёш давлатмиз”, деб қўшимча қилди Назарбоев.