Ўзбекистон ҳукумати 2015 йилнинг 8 август куни Урганч шаҳридаги “Ёшлар кўли” маданият ва истироҳат боғида содир бўлган фожианинг такрорланмаслиги учун барча зарурий чораларни кўради. Ўшанда боғда ташкил этилган концерт чоғида кўприк устида одамларнинг тўпланиши оқибатида у қулаган, оқибатда кўплаб одамлар жароҳат олган ва ҳаётдан кўз юмган эди.

Ҳукуматнинг “Томоша ва концерт фаолиятини амалга ошириш тартибини янада такомиллаштириш чора-тадбирлари тўғрисида”ги қарори билан халқ сайллари, концертлар ва маданий тадбирлар чоғида қўйиладиган хавфсизлик талабларининг сўзсиз бажарилишини назорат қилишни кучайтириш кўзда тутилган.
Ҳукумат ИИВ, ФВВ, Маданият вазирлиги, шунингдек, Қорақалпоғистон Вазирлар Кенгаши, Тошкент шаҳар ва вилоятлар ҳокимиятларига оммавий тадбирлар ўтказилиш жойлари ва объектларининг мунтазам инвентаризацияси ва техник кўрикдан ўтказилишини таъминлашни топширди.

“Ўзбекнаво” эстрада бирлашмасига лицензия ва рухсатнома талабларига қатъий риоя қилиншини назорат остига олиш, ташкилотчилар томонидан кўзда тутилган талабларнинг бажарилишини мунтазам равишда назорат қилишни йўлга қўйиш топширилди.

МТРК ва ЭОАВМАга теле ва радиоканалларнинг бадиий кенгашлари ишини танқидий кўз билан қайта кўриб чиқиш ҳамда тегишли материалларнинг юқори бадиий савиясини таъминлаб бериш топширилди. Шунингдек, “миллий қадрият, урф-одат ва анъаналарга мос келмайдиган, ўсиб бораётган авлоднинг маънавий-ахлоқий тарбиясига салбий таъсир кўрсатадиган” қўшиқ ва видеоклипларни эфирга чиқармаслик борасида чора-тадбирлар кўриш лозимлиги белгиланди.

МТРК, Маданият ва спорт ишлари вазирлиги, “Ўзбекнаво”, Ёзувчилар уюшмаси ва Ўзбекистон бастакорлар иттифоқига миллий мусиқани ривожлантириш юқори савияли асарлар яратилишини қўллаб-қувватлаш топширилди.