Россия Қирғизистон пойтахти Бишкекда Марказий Осиё давлатлари наркополициячиларини ўқитиш марказини яратиши мумкин. Бу ҳақда Россия наркотикларни назорат қилиш федерал хизмати бошлиғи Виктор Иванов маълум қилди, деб хабар бермоқда РИА “Новости” ахборот агентлиги.

“Қирғизистон наркотикларни назорат қилиш давлат хизмати билан унинг негизида Марказий Осиё давлатлари аксилнаркотик бошқармалари ходимларини ўқитиш марказини яратиш масаласи кўриб чиқилмоқда. Бу марказ функцияларини минтақадаги бошқа давлатлар, Афғонистон, Покистон ва Эрон аксилнаркотик бошқармалари ходимларига татбиқ қилиш салоҳияти мавжуд”, деб айтди Иванов Россия ҳукумати комиссияси йиғилишида.

Ивановнинг айтишича, лойиҳани Россия томонидан Қирғизистон наркотикларни назорат қилиш давлат хизматига кўрсатилаётган кўмак дастурининг учинчи босқичида молиялаштириш режалаштирилмоқда. Марказ ўқитувчилари ва инструкторлари сифатида Россия наркотикларни назорат қилиш федерал хизмати ходимларидан фойдаланиш ва ўқитишни Россия методикалари бўйича олиб бориш мўлжалланмоқда.