Самарқанд вилоятидаги минтақавий ногиронларни реабилитация қилиш маркази Ўзбекистон ва Япония ўртасида 2015 йил 11 март куни имзоланган «Самарқанд вилояти минтақавий ногиронларни реабилитация қилиш марказини тиббиёт ускуналари билан жиҳозлаш” лойиҳаси бўйича грант-шартнома доирасида 109,500 АҚШ долларлик замонавий тиббий жиҳозлар билан таъминланди. Бу ҳақда Япониянинг Ўзбекистондаги элчихонаси Кун.уз сайтига маълум қилди.

Тақдим этилган маълумотга кўра, ушбу ижтимоий лойиҳа доирасида Самарқанд вилояти минтақавий ногиронларни реабилитация қилиш маркази барча турдаги умумэътироф этилган физиотерапия муолажалари, жумладан, электротерапия, лазер терапияси, ультратовуш терапияси, магнит терапияси, тракцион терапия ва зарба-тўлқинли терапияни ўзида жамлаган замонавий тиббиёт ускуналари билан жиҳозланди.

2015 йил 19 декабрь куни Самарқанд вилоятида Япония ҳукуматининг “Кичик миқёсли ижтимоий лойиҳаларга беғараз ёрдам” дастури доирасидаги мазкур лойиҳанинг очилиш маросими бўлиб ўтади. Унда Япониянинг Ўзбекистондаги Фавқулодда ва мухтор элчиси Фумихико Като, Япония Вакиллар палатаси депутати, Япония Либерал-демократик партияси (ЯЛДП) Ҳалқаро алоқалар департаменти директори Кадзунори Танака бошчилигидаги Япония Парламенти миссияси иштирок этишади.

Маълумот учун, 1995 йилдан бошлаб ушбу дастур доирасида Ўзбекистондаги давлат тиббиёт ва таълим муассасалари, маҳаллий ҳокимият органлари ва нодавлат нотижорат ташкилотлар (ННТ) томонидан умумий миқдори 23,380,680 АҚШ долларлик 352 лойиҳа амалга оширилди.