Эгей денгизи ҳудудида Россия соқчи кемаси томонидан туркиялик балиқчилар кемасига қарата ўт очилгани ҳақидаги хабар кема хўжайини томонидан рад қилинди. Бу ҳақда CNN Turk нашри хабар берди.

"Биз россияликлар кемасидан 2 километр узоқликда суздик. "Сметливый" ўрнидан қўзғалгани ҳам йўқ ва бизни ҳеч ким ўққа тутмади ҳам. Агар кимдир ўқ узганида биз ўқ овозини эшитган бўлардик", дейди кема эгаси.

Бундан олдинроқ, Туркия Эгейдаги воқеа юзасидан балиқчиларни сўроқ қилиши ҳақида маълум қилганди.

Эслатиб ўтамиз, 13 декабрь куни Россиянинг Эгей денгизидаги халқаро сувларда турган "Сметливый" кемасига Туркиянинг балиқчи кемаси хавфли даражада яқинлашгани туфайли ўт очилгани ҳақида маълум қилинганди.

Шундан сўнг, Россия Мудофаа вазирлиги Туркия ҳарбий атташесини Эгей денгизидаги тушунмовчилик юзасидан чақиртирди.

Россия Туркия атташесини Эгей денгизидаги воқеа салбий оқибатларга олиб келишидан қаттиқ огоҳлантирган.