Jaguar Land Rover Словакияда бир миллиард фунт стерлинг эвазига (1,5 миллиард доллар) янги завод қуришни режалаштирмоқда. Британияликлар мазкур лойиҳани шарқий Европадаги ушбу давлат ҳукумати билан келишиб олганини билдирмоқда.

Словакия ғарбида жойлашган Нитра шаҳрида қуриладиган заводда тахминан 2800 нафар киши меҳнат қилади. Қурилиш 2016 йилда бошланади, 2018 йил охирларида эса конвейердан биринчи автомобиль чиқади. Ишлаб чиқариш ҳажми йилига 150 минг автомобилни ташкил этади, кейинчалик бу кўрсаткич янада ошиши мумкин.
2018 йилда Словакияда янги авлод Land Rover Defender йўлтанламасларини ишлаб чиқариш йўлга қўйилиши кутилмоқда.