Олимларнинг аниқлашича, Ер сайёрасида чақинларга энг кўп дучор бўладиган ҳудуди Венесуэладаги Маракайбо кўли экан: унинг устида йилига тахминан 297 кун давомида чақин чақнаб туради. Тадқиқот натижалари ҳақида Америка геофизика иттифоқи конференцияси чоғида айтилди.

Иш давомида тадқиқотчилар NASA’нинг 1998 йилдан 2003 йилга қадар олган суратларини ўрганиб чиқишди. Аниқланишича, чақин Маракайбо кўлининг Кататумбо дарёсига қуйиладиган жойига энг кўп урар экан.

Иккинчи ва учинчи ўринларни Кабаре (Конго Демократик Республикаси Жанубий Киву вилояти) ва Кампене (Конго Демократик Республикаси) ҳудудлари эгаллади. Олимларнинг таъкидлашича, уларнинг қўлидаги суратлар жуда равшан бўлиб, чақин зарбини 11 км аниқлик билан белгилаш имконини берган.