2016 йил давомида Тошкент шаҳридаги мавжуд кўп қаватли турар-жойлар, маҳалла ва мавзеларда ташқи видео-кузатув мосламалари ўрнатилади. Бу ҳақда 2015 йил 15 декабрь куни Тошкент шаҳар ҳокимлигида ўтказилган брифингда маълум қилинди.

Шу йўл билан видео-кузатув мосламаларида қайд этилган жиноятчилик ва ҳуқуқбузарлик ҳолатлари тегишли идораларни хабардор қилиш ва улар сўровига биноан электрон ёзув тақдим этилади.

Видео-кузатув мосламаларини ўрнатиш ва улардан фойдаланиш хизмати махсус ташкил этилган корхона ва ташкилотлар, бошқарув сервис компаниялари ёки хусусий уй-жой мулкдорлари ширкатлари томонидан ҳар бир хонадон билан тузиладиган шартномалар асосида ташкил этилиши белгиланган.

Шу муносабат билан ҳар бир туманда туман ҳокимининг биринчи ўринбосарлари бошчилигида ишчи гуруҳи тузилиб,кўп қаватли уйларда, маҳалла ва мавзеларда видео-кузатув мосламалари ўрнатиш ишларини ташкиллаштириш, 10 кун муддатда ташқи видео-кузатув мосламалари ўрнатиш бўйича аниқ манзилий таклифларни шакллантириш, камераларни жойлаштиришда кўп қаватли уйларнинг кириш-чиқиш ҳудудлари (подъездлари. – Kun.uz) маҳалла ва мавзеларнинг йўл ва йўлаклари тўлиқ қамраб олинишига диққат қаратиш ва бу борада аҳоли ўртасида тушунтириш ишларини олиб бориш вазифаси топширилган.

Видео-кузатув мосламаларининг марказлашган кузатув хоналари ҳудуд профилактика нозирлари хизмат хоналарида ташкил этилади.

Брифингда видео-кузатув мосламаларини ўрнатиш ва уларга техник хизмат кўрсатиш ишлари грантлар, тижорат банкларининг кредитлари ва аҳоли маблағлари эвазига амалга оширилиши режалаштирилган.