Россия Саноатчилар кенгашининг Халқаро миграцион маркази бош директори Сергей Ткасукнинг фикрига кўра Россиядаги иқтисодий вазият сабабли мамлакатда меҳнат қилаётган Тожикистон ва Ўзбекистон фуқаролари қайта ихтисослашиб, ишлаш учун бошқа давлатларни маъқул кўришмоқда.

“Ушбу мамлакатлар (Тожикистон ва Ўзбекистон) Араб Амирликлари ва Жанубий Кореядаги меҳнат миграциясига кўпроқ аҳамият қаратмоқда. Вазиятнинг бундай тус олишига у ерда иш ҳақларини қаттиқ валютада олиши, бу ерда эса рублда тўланиши сабаб бўлмоқда”, - деди эксперт Sputnik агентлигига берган интервьюсида.

Бундан аввалроқ эса Россия Марказий банки мамлакатдан Марказий Осиё давлатларига юборилаётган пул ўтказмалари ҳажми 2015 йилнинг биринчи тўққиз ойида 2014 йилнинг шу даврига нисбатан 2,5 баробарга камайганини маълум қилган эди. Ткачукнинг қайд этишича, пул маблағларининг юборилиши ҳажмининг камайиши бўйича муҳожирлар сонининг қисқариши ҳақида қарор чиқариш мумкин, бироқ валюталар курсидаги тафовутларни ҳам инобатга олиш зарур.

Россия Федерал миграция хизмати маълумотларига кўра, бугунги кунда РФ ҳудудида 1,8 миллион ўзбекистонлик меҳнат қилмоқда.