15 декабрда россиялик марҳум хонанда Жанна Фрискенинг вафот этганига ярим йил тўлди, бироқ унинг яқинлари ўз ораларида унинг меросини бўлиша олишмаяпти. SUPER нашрига маълум бўлишича, марҳум хонанданинг ишларини юритувчи нотариус унинг яқинларини кейинги ҳафтада йиғиб, Жанна васиятнома қолдирган-қолдирмаганини эълон қилмоқчи. Агар бундай васиятнома бўлмаса, унда хонанданинг барча меросини (шаҳар четидаги уй, Москвадаги квартира, шахсий ҳисоб рақамлар, автомобиль ва қимматбаҳо буюмлар) унинг ота-онаси – Владимир ва Ольга Фрискелар ва унинг икки ёшли ўғли Платон тенг улушда бўлишиб олишлари мумкин бўлади. Платоннинг вакили бўлиб унинг отаси Дмитрий Шепелев чиқмоқда. Қонун бўйича, меросхўрларнинг ҳар бири мероснинг учдан бир улушини олади.

Агар хонанда васиятнома қолдирган бўлса, у ўз бойлиги ва мол-мулкини кимга қолдирганидан қатъи назар, пенсия ёшларини ҳисобга олган ҳолда унинг ота-онаси ва кичкина ўғли қонуний тартибда меросдан ўз улушини олади. Бу улуш ўлчами томонлар келишувига кўра белгиланади. Акс ҳолда меросни бўлишиш барча томонлар муросага келмагунча узоқ йилларга чўзилиб кетиши мумкин.

Владимир Фриске ОАВларга берган интервьюсида қизининг мероси “январь ойигача ҳибсга олинганини” маълум қилди. “Бир нарсани айтишим мумкин, яқин орадаги бўлишиш май-июнда бўлади”, деб айтди хонанданинг отаси.