2016 йил кириб келиши билан Лас-Вегасда анъанага кўра Consumer Electronics Show кўргазмаси – юқори технологиялар дунёсидаги энг йирик тадбирлардан бири очилади.

Бир йил аввал ўтган CES 2015 кўргазмасида кўплаб янгиликлар, жумладан LG G Flex 2 – LG компанияси тарихидаги иккинчи эгилган ва дунёдаги Qualcomm Snapdragon 810 платформасидаги биринчи смартфонлардан бири намойиш этилди. Шубҳасиз, келаётган йилда қизиқарли намойишлар кам бўлмайди, бироқ улар орасида LG G Flex 3 смартфони намойиш қилинмайдиганга ўхшайди.

Жанубий Кореядаги манбаларнинг маълум қилишича, LG компанияси CES 2016 кўргазмасида ўзининг учинчи авлоддаги эгилган смартфонини намойиш қилишни режалаштирмаяпти. Бундан ташқари, бу сериядаги смартфонлар умуман чиқарилмаслиги мумкин, чунки G Flex савдоси ишлаб чиқарувчилар умидини оқламади, G Flex 2 смартфони эса қизиб кетувчи Qualcomm процессори сабаб ёмон отлиқ бўлди.

Агар миш-мишлар тасдиқланса, кўргазмада LG’дан смартфонлар сегментида шов-шувли янгиликларни кутмаса ҳам бўлади, чунки манбанинг таъкидлашича, янги флагман G5 модели 2016 йил апрелда намойиш қилиниши режалаштирилган (бироқ бошқа маълумотларга кўра, унинг илк намойиши MWC 2016 кўргазмасида февраль ойида ўтади), янгиланган V10 эса умуман 2016 йилнинг иккинчи ярмида кўрсатиладиган бўлди.