Германиянинг «Бавария» футбол клуби бош мураббийи Хосеп Гвардиола Мюнхен жамоаси билан шартномани узайтирмасликка қарор қилиб бўлган, дея хабар бермоқда Marca.

Манбанинг хабар беришича, каталониялик мутахассис бу борада «Бавария» раҳбариятини огоҳлантиришга улгурган.

Мюнхенликлар клуби мураббийга бир мавсум учун 20 миллион евро бериш шарти киритилган янги шартнома таклиф қилганди. Бироқ Гвардиола бу таклифни рад этган.

Эслатиб ўтамиз, «Бавария» ва Гвардиола ўртасида тузилган амалдаги шартнома 2016 йилнинг ёзида поёнига етади. Мураббийнинг ўзи Германия кубоги доирасидаги «Дармштадт»га қарши учрашувдан кейин (1:0) ҳозирча, келажаги борасида бир қарорга келмаганини, бу ҳақда келгуси ҳафтада маълумот беришини таъкидлаб ўтганди.

Олдинроқ, Гвардиола «Манчестер Сити» клубини бошқариш борасида келишувга эришиб бўлгани ҳақида бир неча хабарлар тарқалганди.