Туркиянинг Қатардаги фавқулодда ва мухтор элчиси Аҳмед Демирокнинг маълум қилишича, Туркия Қатар ҳудудига икки давлатнинг ҳамкорлиги доирасида, "умумий душманга қарши кураш олиб бориш" мақсадида ўз ҳарбий базасини жойлаштиришни режалаштирган.

"Туркия ва Қатар умумий муаммоларга тўқнашмоқда. Икки давлат ҳам минтақадаги вазиятдан ва айрим давлатларнинг мавҳум сиёсати туфайли хавотирда. Биз умумий душманга қарши турамиз. Яқин Шарқдаги таҳликали вазият шундай чораларни талаб қилади", дейди Аҳмед Демирок Рейтер агентлигига.

Унинг хабар қилишича, Қатарда барпо этиладиган кўп тармоқли базада Туркия Ҳарбий-денгиз кучлари ва Ҳарбий-ҳаво кучлари ҳарбийлари, шунингдек, уч минг нафарга яқин пиёда аскар ва инструкторлар жойлаштирилади.

"Бугун биз шунчаки янги альянс ташкил қилмаяпмиз. Буни тарихий ҳамкорлик деб аташ мумкин", деган элчи.

У базани қуриш ишлари қачон бошланиши ҳақида аниқ маълумот айтмаган.

Қатар эса ҳозирча бу маълумотга изоҳ бермаган.

Бундан олдинроқ, Туркия Қатардан узоқ муддатга газ импорт қилиши тўғрисида хабар қилинганди.