Ҳиндистон Россиядан 5 дона янги авлод С-400 ("Триумф") зенит-ракета комплексини сотиб олади, дея хабар бермоқда Hindustan times.
Шартнома қиймати 400 млрд рупий ($6 млрд)ни ташкил этади. У Ҳиндистон ва Россия ҳукуматлари ўртасида имзоланиб, 6 мингта ўқ-дорини ҳам ўз ичига олади.

Нашр маълумотига кўра, ҳамкорликдаги режалар ҳақидаги расмий баёнот Ҳиндистон бош вазири Нарендра Модининг 23-24 декабрь кунлари Россияга илк бор уюштираётган ташрифи чоғида эълон қилиниши мумкин. Ундан илгари эса бундай турдаги йирик мудофаа савдоларини тасдиқловчи Ҳиндистон мудофаа харидлари бўйича Кенгашининг мажлиси бўлиб ўтади.

Бундай аввалроқ Ҳиндистон Мудофаа вазири Манохар Паррикар ТАССга берган интервьюсида томонлар бош вазирнинг Москвага ташрифи доирасида С-400 комплексини сотиб олиш бўйича келишувга тайёргарлик кўраётганини маълум қилган эди.
С-400 "Триумф" – Россия зенит-ракета тизими бўлиб, 400 километргача масофада жойлашган замонавий ва истиқболли ҳаво-коинот воситаларини уриб туширишга мўлжалланган.