Ироқ жанубида номаълум шахслар томонидан гаровга олинган қатарлик овчилар гуруҳи орасидагиларнинг бири Кувайт фуқароси экани аён бўлди. Бу ҳақда Кувайт ТИВ раҳбари ўринбосари Холид ал-Жаралла маълумот берди.

"Қатарлик ва ироқлик биродарларимиз билан ҳамкорликда Ироқ ҳудудида гаровга олинган ватандошимизни озод қилиш ишларини олиб бормоқдамиз", дея вазирлик вакилининг сўзларини келтиради Al Anaba нашри.

Бироз олдинроқ, 16 декабрь куни Ироқ ҳудудида жангарилар қўлига асирликка тушган 26 нафар қатарликдан 9 нафари озод қилингани тўғрисида хабар берилганди.

Улардан бири жароҳатланган ҳолда Қатарга етиб келган.

Қатарликларнинг мамлакат жанубидаги Нажаф саҳросида гаровга олингани ҳақида Ироқнинг Мутанна вилояти губернатори Фалаҳ аз-Зийади As Sumaria телеканали орқали маълум қилганди.

Бу ҳодиса Бағдод шаҳридан 280 км жануби-ғарбдаги Ас-Самава шаҳри яқинида юз берган. Унинг қайд этишича, Ироқ ТИВ бу қатарликлар гуруҳига мамлакат ҳудудида ов қилиш ҳуқуқини берган, шунингдек уларни мавжуд хатарлар тўғрисида огоҳлантирганди.

Кўп ўтмасдан Қатар ТИВ бу ҳақдаги маълумотни тасдиқлади, лекин гаровга олинган қатарликлар сонига аниқлик киритмади.

ОАВда берилган маълумотларга кўра, гаровга олинган овчилар гуруҳи орасида Қатар қироллик оиласининг вакиллари ҳам бўлган.