9-11 декабрь кунлари Тошкентда Италия-Ўзбекистон савдо палатаси президенти Луижи Иперти ва Турин шаҳри савдо-саноат палатасининг ташқи иқтисодий бўлими бошлиғи Кристиан Аванци бошчилигидаги италиялик тадбиркорлар делегацияси бўлди.

Италия бизнес-миссияси таркибига Tecnocad Progetti (автомобиль дизайни), Mobitecno (тез тиббий ёрдам машиналари ва махсус транспорт воситалари), Gruppo CNL (металл буюм ва ғилдираклар ишлаб чиқариш), Meccanotecnica Umbra (автомобиль насослари ишлаб чиқариш) компаниялари вакиллари кирди.

Италиялик меҳмонлар “Ўзавтосаноат” АЖ фаолияти билан танишиш пайтида компания бошқарув раиси ўринбосари Қобил Азимов томонидан қабул қилиндилар.

Улар ўртасида мазмунли суҳбат бўлиб ўтди, унинг давомида томонлар ҳамкорлик ва ишбилармонлик алоқаларни мустаҳкамлашдан манфаатдорликларини билдирдилар. Хусусан, Ўзбекистон автосаноати учун автомобиль бутловчи қисмлари ва эҳтиёт қисмларини маҳаллийлаштириш дастурларида Италия бизнесининг иштироки катта қизиқиш уйғотади. Ўз навбатида италиялик тадбиркорлар Ўзбекистонга ўз маҳсулотлари ва технологияларини тақдим қилишлари мумкин.

Томонлар икки давлат ўртасидаги бизнес-алоқаларни яқин келажакда ўзаро манфаатли лойиҳаларни ҳисобга олган ҳолда чуқурлаштириш кераклиги ҳақидаги фикрга келдилар.

Ҳамкорликнинг баъзи вариантларини яқин истиқболда амалга ошириш мумкин. Бундай ҳамкорликка Ўзбекистон ёқилғи қуйиш станцияларига ускуналар етказиб беришни киритиш мумкин. Икки давлат тадбиркорлари ўз алоқаларини давом эттиришга келишиб олдилар.