"Бавария" жамоаси ҳимоячиси Жером Боатенг номи Гиннесс рекордлар китобига киритилди. Бу ҳақда мюнхенликлар расмий сайти хабар тарқатди.

Маълум қилинишича, Боатенг Бундеслигада мағлубиятсиз ўйинлар серияси бўйича рекорд ўрнатгани эвазига бунга эришган.

Боатенг 2012 йилнинг 3 ноябридан 2014 йилнинг 19 декабрига қадар ўтказилган Бундеслига ўйинларида "Бавария" билан 56та ўйиндан иборат узлуксиз мағлубиятсиз ўйин ўтказган.

Аввалроқ "Бавария"нинг бошқа футболчиси — ҳужумчи Роберт Левандовски Гиннеси рекордлар китобига кириб, 4та сертификатни олганди.

У энг тезкор хет-трик (3 дақиқаю 22 сония), энг тезкор покер (5 дақиқаю 42 сония) ва энг тезкор пента-трик (8 дақиқаю 59 сония) ва захирадан майдонга тушиб, Бундеслиганинг битта ўйинида энг кўп гол урган футболчи (5) бўлган.