Кремль ЮКОСнинг собиқ раҳбари, бугунги кунда эса мухолиф сиёсатчи бўлган Михаил Ходорковскийнинг баёнотларини кузатиб, уларнинг мазмуни юзасидан давлат раҳбарига ҳисобот етказиб турибди. Бу ҳақда 17 декабрь куни ўтган матбуот анжуманида Кремлнинг расмий вакили Дмитрий Песков айтиб ўтди.

“Бу баёнотлар ОАВда ёритилиши билан биз, табиийки, уларни қайд қилиб борамиз”, - унинг сўзларини келтиради Интерфакс агентлиги.
Таъкидланишича, бу баёнотлар куннинг янгиликлари қаторида президентга етказилади.
Песков Ходорковскийнинг фикрларини батафсил изоҳлашдан бош тортиб, “у ватанида кўпдан бери яшамайди ва амалда реалликдан узилиб қолган” дейиш билан чекланди.

“Мамлакатимиз тарихида бир гуруҳ одамлар Женевада ўтириб ватанни қўмсаганлари ва бу ерда бирор нимани ўзгартиришни орзу қилганлари кўп бўлган. Бу одатда яхшилик билан тугамаган”, - қўшимча қилди Песков.