“Жорий йилнинг 15 декабрида Kun.uz интернет нашрида жойлаштирилган “Ўзбекистонда 500 миллион долларлик кимё заводи қурилади” деб номланган ахборотга “Ўзкимёсаноат” акциядорлик жамияти матбуот хизмати ўз муносабатини билдиришни лозим деб топди.

Биринчидан, “Ўзкимёсаноат” АЖ вакиллари хабарда келтирилган “Даниянинг Intex Engineering, Италиянинг Smet Balestra ва Финляндиянинг Outotec компаниялари билан ҳеч қачон, ҳеч қандай музокаралар олиб бормаган.

Аслида, 2015 йил 5-6 ноябрь кунлари Тошкент шаҳрида ўтказилган Халқаро инвестицион форуми доирасида Испаниянинг Intecsa Ingenieria Industrial S.A., Италиянинг Desmet Ballestra ва Германиянинг Outotec компаниялари билан 2020 йилгача мураккаб ўғитларни ишлаб чиқариш лойиҳасини дастлабки техник иқтисодий асосларини ишлаб чиқиш бўйича ўзаро ҳамкорлик тўғрисида Меморандуми имзоланди.

Иккинчидан, хабарда келтирилган “лойиҳанинг умумий қиймати 502 миллион АҚШ доллар, шундан 400 млн доллари хорижий ҳамкорлар томонидан инвестиция қилинади” жумла ҳам эришган келишувга мутлақо зид, чунки имзоланган меморандумда бундай мажбуриятларни ҳеч қайси томон ўз зиммасига олмаган”.