Тожикистонда болалар ўртасидаги ўлимнинг 34,9 фоизи тўйиб овқатланмаслик оқибатида юз берган. Бу ҳақда журналистларга Осиё тараққиёт банкининг (ОТБ) Тожикистондаги доимий вакили Си Си Ю Бутунжаҳон Соғлиқни сақлаш ташкилоти маълумотларига иқтибос келтирган ҳолда маълум қилди.

“Бу маълумотлар қанчалик аниқлигини билмайман, бироқ озиқ-овқат хавфсизлиги масалалари борасида хавотирланиш учун уларга эътибор қаратиш етарлидир”, деб айтди Си Ю.

Си Ю ОТБ яқин уч йил ичида Тожикистонда озиқ-овқат хавфсизлигини яхшилаш билан боғлиқ иккита лойиҳани молиялаштиришни режалаштираётганини таъкидлаб ўтди.

Хусусан, сув захираларини бошқариш лойиҳасини амалга ошириш режалаштирилган. Банк вакилининг айтишича, бу лойиҳанинг қисмларидан бири ирригация тизимларининг яхшиланиши ҳисобланади.

Бундан ташқари, 2017 йилга озиқ-овқат хавфсизлигини яхшилашга қаратилган лойиҳа режалаштирилган. “Айни пайтда биз иш олиб борадиган аниқ йўналишларни аниқлаш бўйича муайян тадқиқотлар ўтказмоқдамиз. Эҳтимол, бу лойиҳанинг ташкил этувчилари озиқ-овқат маҳсулотлари ишлаб чиқариш ва уларни тақсимлаш бўлади”, деб айтди Си Ю.