2015 йили “Самовий тармоқ” аксилкоррупция кампаниясининг бошланишидан буён қочиб кетган 850 нафар порахўр ва коррупционер Хитойга мажбуран экстрадиция қилинди ёки ўз ихтиёрига кўра қайтиб келди. Бу ҳақда ХХР коррупцияга қарши бошқармаси раҳбари ўринбосари, Хитой Коммунистик партияси Марказий Қўмитасининг коррупционерларни ушлаш бўйича мувофиқлаштирувчи гуруҳи раҳбари Лю Цзяньчао баёнот берди.

“Самовий тармоқ” кампанияси бошланганидан буён Хитойга 850га яқин коррупционер қайтарилди. Улардан 150дан ортиғи ўзлари эгаллаб турган мансаб билан боғлиқ жиноятларни содир этган”, - деди у махсус брифингдаги чиқишида.
Амалдорнинг сўзларига қараганда, гумондорларнинг 40 фоизидан ортиғи мажбурий равишда мамлакатга қайтарилган, яна шунчаси ўз ихтиёрига кўра қайтган, қолгани эса “айрим бошқа шартлар” асосида ХХРга келган.

Skynet номли ушбу кампания жорий йилнинг апрелида ишга туширилди. Хитой раҳбарияти Интерполга коррупцион жиноятда гумон қилинаётган 100 шахснинг номи келтирилган рўйхатни тақдим этди. Улар юзасидан Интерпол “қизил огоҳнома”лар чоп этди. Бундай ҳужжат ташкилотга аъзо давлатларнинг ҳуқуқ-тартибот органларидан жиноятчини топиб, уни экстрадиция қилишни талаб этади.