Ўзбекистоннинг фармацевтик корхоналарида ўтаётган йилда 65 турдаги янги дори воситаларининг ишлаб чиқарилиши йўлга қўйилди. Янгиликлар 20 та корхонада жорий этилди, деб хабар беради Sputnik агентлиги “Ўзфармсаноат” вакилининг тегишли конференциядаги сўзларига иқтибос келтирган ҳолда.

Мутахассиснинг таъкидлашича, шулардан 16 турдаги дорилар асосий дори воситалари рўйхатига киради. 2015 йил учун тайёр маҳсулотларни ишлаб чиқаришни маҳаллийлаштириш дастурига 19 корхонада амалга ошириладиган 31 лойиҳа киритилган эди. Уларнинг умумий қиймати 325.8 млрд сўмни ташкил қилади. Натижада йил якунларига кўра 326.5 млрд сўмлик маҳсулот ишлаб чиқарилиши кутилмоқда.

Шунингдек, жорий йилда 283 млн доллар инвестиция соҳага жалб қилинган бўлиб, шундан 97.7 млн доллар тўғридан-тўғри хорижий киритмалардир.

Бугунги кунга қадар республикада локализация дастури доирасида маҳсулотларнинг 450 янги тури ўзлаштирилган, шулардан 380 таси янги дори воситалари, 70 таси эса янги тиббий буюмлардир. Йил бўйича фармацевтик маҳсулотлар 670 млрд сўмлик ҳажмда ишлаб чиқарилган бўлиб, ўсиш суръати 122 фоизни ташкил қилган.