Америкалик сармоядорлар Дэвид Блицер ва Жош Харрис Англия премьер лигасининг "Кристал Пелас" жамоаси акцияларининг назорат пакетини қўлга олишмоқчи. Бу тадбиркорлар АҚШ Миллий Баскетбол уюшмасининг "Филадельфия Сиксерз" ва Миллий хоккей лигасининг "Нью-Жерси Дэвилз" жамоалари хўжайинлари ҳисобланишади.

"Кристал Пелас" жамоаси мураббийи Алан Пардьюнинг айтишича, америкалик сармоядорлар ва жамоанинг ҳозирдаги раҳбарлари ўртасидаги музокаралар финал босқичида турибди. 54 ёшли мураббийнинг ўзи ҳам бу музокараларда иштирок этмоқда ва у янги раҳбарлар келганидан кейин ҳам жамоа бош мураббийи сифатида ишлашни давом эттиради.

Пардьюнинг қайд этишича, Блиццер ва Ҳаррис спорт жамоаларини бошқариш борасида катта тажрибага эга ва улар "Кристал Пелас" жамоасини ривожлантира олишади. У молиявий кўмак Лондонда яна бир катта жамоа юзага келишини таъминлашига ишонч билдирган.

Музокараларнинг жиҳатлари ҳақида бошқа маълумотлар берилмаган.

Маълумот учун, "Кристал Пелас" 1905 йилнинг 10 сентябрида ташкил топган. Жамоа ўз уй ўйинларини 26309 нафар томошабин сиғимига эга "Селхерст Парк" стадионида ўтказади. Бу жамоа Лондоннинг Кройдон округидаги Жанубий Норвуд шаҳарчаси шарафини ҳимоя қилади.

Жамоанинг тарихидаги энг яхши натижа 1990-91 йиллар мавсумида АПЛдаги учинчи ўрин ва 1990 йилдаги Англия Кубоги турнири финали ҳисобланади.

"Кристал Пелас" жорий мавсумда 16 турдан кейин 26 очко тўплаган ҳолда турнир жадвалининг 6-ўрнида бормоқда.