Франция молия вазири Мишель Сапен Халқаро француз радиосига берган интервьюсида ИШИДнинг нефть савдоси ҳисобига молиялаштирилишига чек қўйиш зарурлигини айтди.

Унинг айтишича, жангарилар назорат қилаётган нефть объектларига зарба бериш ИШИД молиялаштирилишини тугатишнинг энг самарали усули ҳисобланади.

Сапеннинг фикрича, ИШИД каби йирик террорчилик гуруҳи билан бир қаторда кичкина гуруҳларга ҳам маблағлар келишига қарши курашиш лозим.

Вазирнинг таъкидлашича, бундай трафикнинг мавжудлигининг ўзи чоралар қабул қилиш мажбуриятини қўяди.

Аввалроқ АҚШ молия вазирининг террорчиликка қарши кураш ва молиявий разведка бўйича ўринбосари Адам Шубин Туркия ва Сурия ИШИДдан нефть сотиб олаётганини айтганди.